इमोशनल ब्लॅकमेल

आपण आईला खूप त्रास दिला याची रितिकाला बोच लागून राहिली. हा जन्मच व्यर्थ आहे आपला... तिने ताटात एक चपाती भाजी घेतली आणि टेबल वर बसून एक घास तोंडात टाकला. दुसऱ्याच क्षणी घास कडू लागायला लागला... जेवणावरची इच्छाच उडाली. तिने सगळे ताट डस्टबिन मध्ये ओतून ताट धुवून ठेवले आणि पुन्हा आपल्या बेडरूम मध्ये जाऊन पडली. मन सैरभैर झाले होते. मनाला स्थिर करण्यासाठी तिने गाणी ऐकली पण त्यातही रस वाटेना, इतक्यात तिला फेसबुकची आठवण झाली आणि हृदयात धडधड होऊ लागली... क्षणात आनंद वाटू लागला. तिने पटकन लॅपटॉप ऑन करून फेसबुक लॉगिन केले. 'प्रिन्स' आयडी वरून आलेला तो संदेश पुन्हा पुन्हा वाचून आणि त्या मॉडेल तरुणाचे आकर्षक फोटो पाहून रितिका स्वप्नांच्या दुनियेत पोहोचली. त्याला रिप्लाय देण्याची जबरदस्त इच्छा मनात सारखी उफाळून येत होती. परंतु विवेक, संस्कार आडवे येत होते परंतु शरीर मन पेटून उठले होते. इतक्या वर्षात कुणीतरी आपल्याला साद घालतेय आणि आपण संस्कार आणि विवेकाच्या जोखडात अडकून बसलोय. मन बंड करत होते परंतु तिला हिम्मत होत नव्हती.