इमोशनल ब्लॅकमेल ! कथा क्रमांक २

भेटण्याची वेळ दिल्या नंतरचा काळ तिच्यासाठी अत्यंत कठीण होता. क्षणात हुरहूर, क्षणात हृदयात धडधड.... मन पाहू लागलेल्या स्वप्नांचा पट डोळ्यांसमोर दिसू लागला होता. मनाला सावरत दिवस कसा तरी कामात घालवून संध्याकाळी रितिका तयार झाली. आरशात स्वतःला पाहताना एक वेगळीच लज्जा तिच्या चेहेऱ्यावर विलसत होती. ती घाईतच घरातून निघाली... वेळ होईल म्हणून तिने रस्त्यावर येत रिक्षा केली आणि ठरलेल्या ठिकाणी पोहोचली. भेटण्याची वेळ अजून झालेली नव्हती. घड्याळाचे काटे पुढे सरकत होते आणि शेवटी ठरलेली ती वेळ काही क्षणात जवळ आली.... तिचा प्राण डोळ्यांमध्ये जमा झाला होता. ती रस्त्याकडे नजर लावून त्या अनामिक प्रिन्स ची व्याकुळतेने वाट पाहत होती की तिचा फोन वाजला. डिस्प्ले वर 'प्रिन्स' नाव झळकत होते.... तिने पटकन फोन रिसिव्ह केला आणि अधीर होत काय ऐकायला मिळतेय याची वाट पाहू लागली. समोरून तो बोलत होता.