सुटका : भयकथा भाग २

इतक्यात परत वीज गेली आणि बाहेर विजा कडाडल्याचा प्रचंड आवाज आला. पुन्हा कोणीतरी तिचा हात धरला. अगदी जोरात. जणू काही हात धरणारा त्याची बोटं तिच्या मनगटात रुतवत होता. त्या स्पर्शाने तिला एकदम किळस आली. तिला जोरात किंचाळायचं होतं, अभीला हाका मारायच्या होत्या, पण आवाजच फुटत नव्हता. तिला असं वाटत होतं की ती बर्फाच्या एक गार लादीवर उभी आहे . आणि त्यात ती बुडत चाललीये. कसलासा उग्र दर्प पसरत चालला होता. उलटी होईल असा, सडका, कुजका. माणसाचं मांस जळाल्यासारखा. परत मगाचचाच अनुभव येत होता. तिला कोणीतरी हाक मारतंय असं वाटत होतं. कोणीतरी गळा आवळतंय असं वाटत होतं. ती गुदमरत होती. थंडी वाढत चालली होती. तिला श्वासही घेता येत नव्हता. तिचे डोळे प्रचंड दुखत होते. भाजल्यासारखी त्यांची आग आग होत होती. सुटकेची प्रचंड धडपड करून सुद्धा तिला सुटता येत नव्हतं. आणि एक क्षणी ती बेशुद्ध झाली.