लग्नासाठीच का जन्म आपुला 2

लग्नाच्या पहिल्याच रात्री दिपकने सुनिताला सर्व परिस्थिती सांगितली व काहीही करण्या आधी कोणी दुखावणार नाही हे लक्षात ठेवायला सांगितले. तिही भान ठेवून वागू लागली. घरातील मोठ्यांना विचारून त्यांना हवे नको याकडे लक्ष देऊ लागली. हळूहळू ती त्यांच्या मनात बसू लागली. लग्नाला चार महिने पुर्ण झाले नाही तो सुनिताने गोड बातमी दिली. घरात आनंदी आनंद झाला. नात नातू, जेही होणार त्याच्या स्वागताची जय्यत तयारी सुरू झाली. मात्र त्यांचा हा आनंद जास्त काळ टिकला नाही. सुनिताला तिसरा महीना लागला. कोणाच्या ध्यानी मनी नसतांना आपोआप तिचा गर्भपात झाला. तिला दोष देण्याऐवजी त्या देव माणसांनी, कधीकधी होतं असं मुलीचं लहान वय असलं की असं तिलाच समजावून सांगत तिचे सांत्वन केले.