चितळेंच्या घरात आज सामानाची बांधाबांध सुरू होती. साहिल, सीमा आणि त्यांची मुलगी सोनू, तिघांनाही उद्यापासून ड्युटीवर जॉईन व्हायचं होतं. नार्कोटिक्स डिपार्टमेंटचे ते तिघेही प्रशिक्षित गुप्तहेर होते. त्यांचं प्रशिक्षण संपल्यावर तिघेही एक कुटुंब म्हणून अज्ञातवासात साहिलच्या घरी रहात होते. साहिलच्या घरचे सोडले तर कोणालाही त्यांचा गुप्त जगाबद्दल काहीच माहीत नव्हतं.
आज त्यांचं प्रशिक्षण संपून 5 वर्ष पूर्ण झाली होती. नियमाप्रमाणे आज त्यांचा अज्ञातवास संपला होता. उद्या त्यांना मुंबईतील नार्कोटिक्स विभागातील गुप्त प्रशिक्षण केंद्रात हजर व्हायचं होतं. तिथेच त्यांना पुढच्या मोहिमेबद्दल माहिती मिळणार होती.
चितळेंच्या परिवार बंगल्यावर आज उदासी पसरली होती. साहिल, सीमा, सोनू, साहिलचा धाकटा भाऊ, त्याची बायको व दोन मुले, आणि आईबाबा, असे मोठे कुटुंब होते त्यांचे. इतक्या वर्षांत खूप सवय झाली होती सगळे एकत्र असण्याची. आता पुन्हा कधी भेट होईल, न होईल काहीच सांगता येत नव्हतं. संपर्काची शक्यता नव्हती. होता फक्त अनिश्चित दुरावा.
दुसऱ्या दिवशी पहाटेच खासगी बसने साहिल, आणि कुटुंब मुंबईला जायला निघाले.सगळा चितळे परिवार त्यानं निरोप द्यायला जमलं होता. एका बाजूला कुटुंबियांना सोडून आल्याचे दुःख, तर एका बाजूला नवीन आयुष्याची उत्सुकता. तिघेही मनातला भावनांचा कोलाहल सावरायचा प्रयत्न करत होते.
बस मुंबईत शिरली तसं तिघांनीही सामान गोळा केले. त्यांचा थांबा आला. त्या तिघांना घ्यायला एक पोलीस व्हॅन आली होती. तिघांनाही नार्कोटिक्स विभागाच्या ऑफिसमध्ये नेण्यात आलं. तिथे त्यांचे रिपोर्टिंग ऑफिसर त्यांची वाटच बघत होते. त्यांच्यासारखेच अजून वीस कुटुंब तिथे आली होती. काही दोन तर काही तीन किंवा चार जणांची. इथून पुढे सगळे विविध ठिकाणी जाणार होते.
त्या तिघांची नियुक्ती अहमदाबादला झाली होती. त्यांना रेल्वेचं तिकीट, आणि काही गरजेचं सामान दिलं गेलं. त्यांच्याबरोबर अजून 5 कुटुंब होती. इथून पुढे ते एक टीम होते. त्यांच्या गुप्त मिशनमध्ये एकमेकांचे साथीदार होते ते.
पुणे स्टेशनला अहमदाबाद गाडीची घोषणा झाली. प्लॅटफॉर्मवर लोकांचे घोळके उभे होते. गाडी सुरू झाली आणि कुठून कोण जाणे, अचानक पंधरा वीस फुगेवाले गाडीत शिरले. विविध डब्यांमध्ये दरवाजाशी जागा पकडून त्यांनी बसून घेतलं. आता ते थेट अहमदाबादलाच उतरणार होते.
.....
अभा बोडस
.....
अभा बोडस
Download the app
आता वाचा ईराच्या कथा सोप्या पद्धतीने, आजच ईरा app इंस्टॉल करा