फुगे भाग 2

रात्रीची जेवणं झाल्यावर साहिल एकटाच बाहेर पडला. सोनू आणि सीमा तंबूतच झोपायची तयारी करत होत्या. रस्यावरची वर्दळ कमी होत होती. बऱ्याच वेळानंतर एखादी एखादी गाडी रस्यावरून जात होती. साहिल एका सुनसान मुख्य रस्त्यापासून लांब असलेल्या गल्लीत वळला. जुनाट, बसक्या घरांची ती गल्ली होती. अधून मधून तुरळक इमारती होत्या.एका घराच्या बाहेर दोन माणसं एकमेकांशी काहीतरी बोलत होती. सतत आजूबाजूला कोणी येत नाहीये ना हे बघत होती. साहिलने त्यांना न बघितल्यासारखं करून पुढे गेला. त्यांच्या पुढच्याच इमारतीमध्ये शिरला. ती भिंत त्या दोघांच्या मागेच होती. आवाज न होऊ देता साहिल भिंतीवर चढला. आता त्याला ते दोघेही व्यवस्थित दिसत होते. त्यातल्या एकाने खिशातून एक चिठोरा काढला. “हा पत्ता घे. इथून माल उचलायचा. हायवेवर घेऊन जायचा. पुढचा पत्ता तुला तिथे मिळेल. कुणालाही ह्यातलं काही कळलं, तर तुझ्या घरच्यांचं काही खरं नाही लक्षात ठेव.”