गंधबावरे 60

दुसऱ्या दिवशी सकाळी अनु लवकरच उठली. तिचे सगळे आवरून ती मिहिरच्या आईला मदत करण्यासाठी आली. तिथे ती पाहते तर काय तिच्या आधीच श्रेया तिथे येऊन पोहोचली होती. ती मिहिरच्या आईशी गप्पा मारत होती आणि बोलता बोलता ती त्यांना मदत देखील करत होती. म्हणजेच ती स्वतःला सिद्ध करत होती. मिहीरच्या आईच्या मनात जर तिने स्थान मिळवले तर त्या घरात तिला स्थान मिळणार होते हे तिने जाणले होते. मिहिरच्या आई देखील श्रेयाशी गोड बोलत, गप्पा मारत काम करत होत्या. त्यांची सकाळी थोडीफार धावपळ होत असायची. सकाळी सर्वांना नाश्ता लागत होता. नाश्त्यामध्ये रोज वेगवेगळे प्रकार केले जायचे. कधी उपमा तर कधी पोहे, कधी मोठ्या रव्याचा सांजा तर कधी शिरा हे प्रकार सोडूनही त्या अधेमध्ये दक्षिणात्य पदार्थ देखील बनवायच्या. इडली, डोसा, उत्तप्पा हे पदार्थ बनवण्यात त्यांचा जणू हातखंडच होता. तळलेले पदार्थ त्या फारशा करत नव्हता कारण मिहीरच्या वडिलांना त्याचे पथ्य असल्याने त्या कधी बनवत नव्हत्या. नाश्ता झाला की चहा, चहा झाले की मिहिरच्या बाबांना रोज ताक लागत असल्याने त्या रवीने ताक घुसाळ्याच्या कारण ब्लेंडरने फिरवलेले ताक त्यांना आवडत नव्हते त्यामुळे त्या नेहमीच रवीने ताक घुसळून घ्यायच्या. सकाळच्या जेवणात कंपल्सरी ताकच असायचे. त्यानंतर स्वयंपाकाची तयारी. पोळ्या लाटायला नंतर बाई यायची त्यामुळे बाकी स्वयंपाक त्या उरकून घ्यायच्या. एकदा स्वयंपाक घरातून बाहेर आले की पुन्हा जेवण्यासाठीच फिरकायचे असा त्यांचा नियम होता. त्यातच त्यातच रुतून बसलेले त्यांना आवडत नव्हते त्यामुळे त्यांचीच सवय अनुला लागली होती. ती देखील पटकन आवरून बाहेर येऊन बसायची.