घरकुल आपुले छान _भाग १

समीरची स्वतःची सीए फर्म होती. प्रीती तिच्या कंपनीच्या कामासाठी तिथे आली होती. नंतर ती वरचेवर तिथे येत होती. कंपनीसाठी मीटिंग करता करता दोघे वैयक्तिक पातळीवर एकमेकांना भेटू लागले. ते एकमेकांच्या प्रेमात कधी पडले त्यांनाही कळलंच नाही. प्रीती आणि समीरचं एकमेकांवर खूपच प्रेम होतं. चार वर्षांंपासून प्रीती आणि समीर प्रेमात होते. त्यांच्या प्रेमाला दोघांच्याही घरून संमती होती. प्रीतीचे आई-बाबा लवकर लग्न व्हावं म्हणून घाई करत होते परंतु समीरच्या बाबांचं असं मत होतं की समीर जरी सीए झाला असला, पिढीजात व्यवसाय असला तरी त्याला स्वतः काम करण्याचा अनुभव घेऊ दे. थोडं यश त्याच्या पदरात पडू दे मग आपण लग्न करूया. समीरने प्रीतीच्या आई-बाबांना खात्री दिली होती की तुम्ही काही काळजी करू नका मी लवकरच प्रितीशी लग्न करेन.