देवा सोड गाभारा

कोठे आहेस देवा सांग
कोठे आहे तुझे बस्तान
सर्व ऋतूंमध्ये सुरक्षित गाभारा
फक्त हेच आहे ना तुझे वसती स्थान

तुझ्यासाठी चंदनाचा देव्हारा
हार फुले चांदी सोनं
संगमरवरी तुझे मंदिर
जाणशी का किती दुःख बाहेर
उघड्यावरचा संसार
नाही पाणी, नाही भाकर
किती भूक किती तहान
पहा फुटतो का पाझर

तुझ्यासाठी होतो घंटा नाद
देव आहे की नाही
नेहमीच होतो वितंड वाद
दुःखितांच्या अश्रूंसाठी
तळमळतो का तुझा प्राण
फक्त एकदा,
बाहेर ये गाभाऱ्यातून
क्षमा मागशील, खजील होऊन

........ योगिता मिलिंद नाखरे