नात्यांचा गोडवा गोकुळ भाग १

पाय लागू माई! म्हणत कृष्णाजींनी मंजू बेन ला वाकून नमस्कार केला.कसं काय येणं केलं कृष्णाजी? बऱ्याच दिवसांनी दर्शन दिलं तर! आपण कुठे होतात इतके दिवस?
'मला आपली सर्वांची आठवण आली. म्हणून माझे पाय तुमच्या गोकुळाकडे वळले. हो तर !आमचं घर म्हणजे जणू कृष्णाचं गोकुळच !माझ्या दोन्ही सूना एवढ्या समंजस आहेत, त्या दोघी आपली सगळी कामं अगदी व्यवस्थित करतात .
'हो ना! मला सुद्धा तुमचं खूप कौतुक वाटतं'. 'तुम्ही संपूर्ण घराला, घरातील माणसांना कसं रेशमी धाग्यात गुंफून ठेवलेलं आहे.'
बरं ते राहू द्या. कोणतं काम काढलं? मंजू बेन म्हणाल्या.
माई ,मला शामजी भाईंशी जरा व्यवसायासंबंधी बोलायचं होतं. हो का! पण ते सध्या दुकानावर आहेत. कोणतं काम होतं?'
'श्यामजी भाईंना पितळी मूर्त्यांची खूप आवड आहे'. 'त्यांचे ग्राहक हे ठराविक असतात. त्यांचा मला फोन आला होता की आपण दोघे परदेशातून म्हणजे स्कॉटलंडला जाऊन वेगळ्या पद्धतीच्या पितळी मूर्त्या आणू.' तसं माझं तेथील व्यापाऱ्यांशी बोलणं झालं आहे.' कृष्णाजींनी येण्याचं प्रयोजन सांगितलं.