सोनेरी बादल भाग 8

हळूहळू पाहुणे यायला सुरुवात झाली. वाडा हास्याने, किलबिलाटाने गजबजून गेला. सगळे कार्यक्रम उत्साहात सुरू होते. दोन दिवस आधी ग्रहमक पार पडलं. प्रीतीच्या हातावर कोपरापासून मेंदी रंगली होती. त्या लाल हातांवर हिरवा चुडा शोभून दिसत होता. मोत्यांच्या मुंडावळ्या कपाळाची शोभा वाढवत होत्या. लग्नाच्या दिवशी गुलबक्षी साडीत ती नववधू म्हणून उभी राहिली, तेव्हा सारे बघतच राहिले. अगदी नक्षत्रासरखी दिसत होती. सोनूही पितांबर आणि चिंतामणी उपरण्यामुळे अगदी उठून दिसत होता. मंगलाष्टक झाली, आणि ठरल्या मुहूर्तावर अंतरपाट दूर झाला. दोघांच्यामधले सारे दुरावे देवब्राह्मणांच्या साक्षीने आणि आशीर्वादाने दूर झाले. दोघेही आता एकरूप झाले होते. दोघांनीही मनापासून सगळे विधी पार पाडले. प्रीतीच्या अंगावर सौभाग्यलंकार चढले. सप्तपदी चालताना दोघांनाही एकमेकांना अनेक वचनं दिली. साऱ्या उपस्थितांचे आशीर्वाद घेतले. एकमेकांना घास भरवले गेले. दोघांची भरपूर थट्टा मस्करी केली जात होती. दोन्हीकडच्या आज्या, मावश्या आत्या सारखी दोघांची दृष्ट काढत होत्या.