गुलाल ! पार्ट 12

दर्शन दिवसभर अभ्यासिकेत अभ्यास करत बसायचा तर आभास याचाच फायदा घेऊन फ्लॅटवर कस्टमरला बोलवायचा. सुरुवातीला आभासने ठरवले होते की दहा हजार जमा होताच डेटिंग अँप अनइन्स्टॉल करून टाकायचे परंतु एकदा व्यसन लागले की ते व्यसन माणसाला सहजासहजी सोडत नाही. आभासलाही आता व्यसन लागले होते.अँपवर एज-लाईक सांगण्यात , पीक सेंड करण्यात , व्हिडीओ कॉल करण्यात , कस्टमर शोधण्यात , त्यांना लोकेशन सेंड करण्यात , चार्जेस कमी जास्त करण्यात दिवस कधी निघून जायचा कळतच नव्हते. प्रीचा दिवस उजाडला. जवळच्या हनुमान मंदिरात हनुमान चालीसाचे पठण करून दर्शन निघणार इतक्यात समोर प्रकाश स्कुटी घेऊन उभा होता. प्रकाशने स्कुटीवरूनच दर्शनला परीक्षा केंद्रावर नेऊन सोडले. प्रकाश आल्यामुळे दर्शनला फार बरे वाटले. कुणीतरी आपला जवळचा माणूस सोबत असल्यासारखे त्याला वाटत होते. पहिला पेपर जीएसचा होता. सकाळी 9 ते 11 जीएसचा पेपर झाला. अकराला पेपर सुटल्यावर दर्शन बाहेर आला तर त्याला समोर प्रकाश उभा दिसला. त्याच्या हातात डब्बा होता.