गुलाल ! पार्ट 2

" नमस्कार. मी दर्पण पवार. काही वर्षांपूर्वी मीही तुमच्याप्रमाणेच एमपीएससी करायला पुण्यात पेठेत आलो होतो. डोळ्यात खूप सारी स्वप्ने होती. तीन वेळा इंटरव्ह्यू दिला आहे मी एमपीएससीचा. असो. आज तुमचा पहिला दिवस. तुम्हाला दहावी बारावीत किती टक्के मिळाले काही फरक पडत नाही. जो आजपासून मन लावून अभ्यास करेल तोच ही शर्यत जिंकेल. सातत्य , परिश्रम , जिद्द आणि सर्वात महत्वाचं स्मार्टवर्क याशिवाय पर्याय नाही. डॉक्टर एपीजे अब्दुल कलाम म्हणायचे की आपला मेंदू आपला मित्र असू शकतो आणि आपला शत्रूदेखील. तसच मी म्हणेल की आपला हातातला हा मोबाईल आपला मित्रही असू शकेल आणि शत्रू पण. तो आपल्याला घडवू पण शकतो आणि बरबाद पण करू शकतो. फक्त तुमच्यावर डिपेंड आहे मोबाईलचा कसा वापर करायचा. एकच सल्ला देईल पंचवार्षिक योजना बनवू नका. दोन वर्षांत किमान एखादी सरळसेवा तरी उत्तीर्ण व्हा. मी अनेकांना यूपीएससीपासून तलाठीपर्यंतचा प्रवास करताना बघितले आहे. एक पोस्ट भेटली की प्रवास संपत नाही. उलट आर्थिक स्थैर्य येते आणि घरच्यांचे टोमणे बंद होतात. असो. सर्वांना खूप खूप शुभेच्छा. जो अर्जुनासारखा एकाग्र असेल त्याच्याच अंगावर यशाचा गुलाल उधळला जाईल !" दर्पण सर म्हणाले.