गुरुदक्षिणा (भाग ५ वा)

आयुष्यात पहिल्यांदा त्यांच्या येण्याने कोणी विद्यार्थी एवढा खूश झाला होता. त्याचा उत्साह पाहून सरांनाही नवनिर्मितीची चाहूल खुणावू लागली. आत येत त्यांनी वर्गखोली उघडली. जेमतेम दोन वर्गखोल्या असलेली ती शाळा आतून टापटीप पाहून त्यांना पुन्हा आश्चर्य वाटले.
वर्गखोलीत असलेले कपाट उघडत त्यांनी जुनी रजिस्टर्स बाहेर काढली. मागच्या वर्षी मे महिन्यात बंद झालेल्या शाळेत कुणी शिक्षक रुजू झालाच नसल्याने, जून महिन्याच्या शैक्षणिक वर्षाला कागदोपत्री सुरवात झाली नव्हती. एकाच रजिस्टरमध्ये पहिले ते चौथीच्या मुलांची हजेरी घेण्यात आली होती. पावसाळा संपताच पालक वीट भट्टीवर कामाला जात असल्याने स्थलांतरित मुलांचे प्रमाण जास्त होते परिणामी पटावर खूप कमी विद्यार्थी संख्या होती. सर सारी माहिती चाळत असतांनाच दहाबारा मुलांचा घोळका लगबगीने शाळेत येऊन पोहचला. जसे असतील त्या अवस्थेत बारकूने मुलांना जबरदस्तीने शाळेत आणले होते.