हलगी भाग-२

दोघेही संध्याकाळी आपापल्या घरी गेली. रात्रीच्या जेवणानंतर विलासने आईला तो दुसऱ्या गावात हलगी वाजवायला जाणार आहे. त्यासाठी त्याला चांगले पैसे पण मिळणार आहेत असे सांगितल्यावर ती खूप खूश झाली. सकाळी लवकर उठवायला सांगून तो झोपायला बाहेर अंगणातल्या बाजेवर पहुडला. त्याचे घर झोपडी वजा होते. त्याचे आईवडील व तो त्या घरात राहायचे. एक बहिण होती तिचे लग्न झाले होते. वडिल दारूच्या आहारी गेलेले. त्याची आई लोकांच्या घरी धुणभांड्यांची काम करायची. त्याचे वडिलही आधी हलगी वाजवायचे, ज्यात ते पैसे कमवायचे ते सगळे दारू पिण्यात घालवायचे. आई जे चार घरचं उरलेले अन्न दिले जायचे तेच खाऊन कसंबसं जगायचे. हा थोडं मोठा झाल्यावर वडिलांबरोबर हलगी वाजवायला जायचा तो लवकरच ते वाजवायला शिकला होता. तो मोठा होत गेला तसा त्याच्या वडिलांनी त्याच्या जबाबदारीतून अंग काढून घेतलं. त्याच्या व आईच्या जीवावर तो जगू लागला.