हलगी भाग-४

बघता बघता काॅलेजचे दिवस सरून गेले. शेवटच्या दिवशी तो तिला सांगणार होता. पण ती त्या दिवशी आलीच नाही. नंतर पण तो प्रकाशसोबत काॅलेजमध्ये जाऊन आला ती भेटेल या एकाच आशेने पण प्रत्येकवेळी त्याच्या पदरी निराशाच पडायची. त्याला तिचे नाव व गाव सोडता बाकी काहीच माहिती नव्हतं. त्यालाही कधी तसी गरज वाटली नाही. फोन तर त्याच्या जवळ नव्हता. कधी तरी प्रकाशचा फोनवर बोलायचा पण जास्त नाही. त्याच्या खिशाला ते परवडणारे नव्हतेच. तिनेही तिच्या बाबांना आवडणार नाही म्हणून नंबर कोणालाच दिला नव्हता. त्यामुळे तिच्याशी संपर्क साधणे अवघड होतं. काॅलेज संपून सुट्ट्या असल्याने दुसरे कोणी मित्र-मैत्रिण भेटण्याची शक्यता नव्हतीच. त्यामुळे तो खूप हताश झाला. नंतर निकालाच्या वेळीही ती आली नसल्याने भेट झालीच नाही. तिच्याबद्दल कोणाला काही माहितीही नव्हते. त्यानंतर ते गावाकडे आले. पण तेव्हापासून विलास खूपच उदास राहू लागला.