हरिणी
ईरा चॅम्पियन्स ट्रॉफी 2025
जलद लेखन
संघ कामिनी
ईरा चॅम्पियन्स ट्रॉफी 2025
जलद लेखन
संघ कामिनी
भाग 1
तिचा आज या जगातला पहिला दिवस होता.पाउस कोसळत होता. सगळं रान हिरवेगार झाले होते. त्या उंच गवतात माझा जन्म झाला. आईने चाटून मला स्वच्छ केलं. आणि मला उभं रहाण्यासाठी प्रोत्साहन दिलं. माझे पाय खरंतर खूप नाजूक होते. मी दमले होते खूप. पण मला माहित होतं, मला जगायचं असेल तर मला उठून उभं राहणं गरजेचं होतं. तरच मी शिकाऱ्यांपासून वाचू शकणार होते.
आईने मला पुन्हा एकदा उभारी दिली. मी उठून उभं रहायचा प्रयत्न केला. पण जेमतेम निम्मी उभी राहिले, आणि पायांनी साथ सोडली. मी खाली पडले. पण मला थोडासा आत्मविश्वास मिळाला. पुन्हा एकदा सगळा जोर एकवटून मी उभी राहिले. पाय लटपटत होते माझे. पण मी हळूहळू आईच्या पाठीमागे चालायला लागले.
लवकरच मला व्यवस्थित उभं राहता, आणि चालता यायला लागलं. पण अजून पळता मात्र येत नव्हतं मला. त्यामुळे आईने मला त्याच गवतात लपवलं. तिला पाणी प्यायला नदीवर जायचं होतं. मी नुकतंच दूध प्यायलं होतं, त्यामुळे माझं पोट भरलं होतं. आईचा इशारा समजून मी गवतात लपून बसले. गवतात बसल्या बसल्या मला झोप लागली.
लहानपणी आपण किती निरागस असतो ना? कुठल्याच संकटाची जाणीव नसते. सगळं जग आपल्यासारखंच निरागस निष्पाप आहे असं वाटतं आपल्याला. पण एक दिवस आपल्या आयुष्यात असा उगवतो, जो आपल्याला क्रूर वास्तवाची जाणीव करून देतो. तो दिवसही मला अशीच जाणीव करून देणारा ठरला.
गवतात लपलेले असताना मला अचानक धोक्याची जाणीव झाली. आजूबाजूचे पक्षी, छोटेमोठे प्राणी ओरडून धोक्याची पूर्वसूचना देत होते. पण मला माहित होतं, आत्ता हालचाल करणं, म्हणजे मृत्यूला आमंत्रण दिल्यासारखं होतं. मी इंचदेखील हलले नाही. सुदैवाने माझ्याकडे असं एक रक्षक तंत्र होतं, जे माझ्या आता उपयोगी येणार होतं.
हळूहळू एक जनावर माझ्या जवळजवळ यायला लागलं. दोन भेदक डोळे माझ्या वर शोधक नजरेने बघत होते. त्या जनावराला मी दिसले नव्हते. पण कदाचित अनुभवाने त्याला माहित असावं, की एक पिल्लू इथे लपलंय. मी गवतात इतकी निश्चल बसले होते, की तो मला पाहू शकत नव्हता, आणि अजूनतरी मी मोठी होईपर्यंत, मला कुठलाच गंध नसल्याने, त्याला मला वासाने हुडकणं शक्य नव्हतं. पण मी जरा जरी हालचाल केली, तर मला कुठलीही संधी मिळणं शक्य नव्हतं.
क्रमशः
अभा बोडस
अभा बोडस
Download the app
आता वाचा ईराच्या कथा सोप्या पद्धतीने, आजच ईरा app इंस्टॉल करा