हे बंध रेशमाचे... भाग ३४

महेशराव बाहेर उभे होते. सिस्टरने बाहेर येऊन सांगितले. त्यांनी घरी सांगावा धाडला. घरचे सगळे दवाखान्यात आले. तोपर्यंत सिस्टरने बाळाला आंघोळ घालून कपड्यात गुंडाळून आणले होते. आत्याबाई सुहास्य मुद्रेने तिच्याजवळ आल्या. पुढे होऊन त्यांनी तो मांसाचा गोळा आपल्या हातात घेतला व त्याच्याकडे निरखून पाहू लागल्या. त्याच्याकडे पाहत असताना त्यांचा ऊर भरून आला व त्यांनी त्या बाळाला छातीशी कवटाळले.