हे बंध रेशमाचे... भाग ३८

बारसे तिकडे आल्यावर करायचे असे त्यांनी ठरवले होते. बारशाची तारीख ठरली आणि महेशराव उमाला परत न्यायला आले. उमा त्यांच्यासोबत सासरी जायला निघाली. तिला मृणालच्या वेळी आपण मृणालच्या बारशादिवशीच सासरी परतलो होतो हे आठवले. त्यावेळी मुलगी झाल्याची नाराजी आत्याबाईंनी दुसऱ्या एका क्षुल्लक प्रसंगावरून काढली होती. आपण सासरी परतताना अजिबात आनंदी नव्हतो हे तिला आजही आठवले.