हे घर पण तुमचंच आहे भाग ३

"सुमेधा तू काळजीच करू नकोस. नेहा आमची लेक आहे. अगं पूर्वीच्या काळी मुलीच्या सासरी असं करायचं नाही, तसं करायचं नाही असं सगळं होतं. अर्थात हे सर्व आपल्यावर असतं. म्हणून तर आमच्या आई बाबांनी त्यावेळी सुद्धा माझ्या आईबाबांना विश्वास दिला. हल्ली सुद्धा काही जण आपण मुलाकडचे म्हणून आयुष्यभर तोरा मिरवतात आणि मुलीच्या माहेरच्यांना कायम कमी दर्जा दिला जातो. हल्ली बऱ्याच ठिकाणी एक अथवा दोन अपत्य असतात. अशा वेळी हेवेदावे करण्यात काहीच अर्थ नसतो. प्रत्येक लेकराला आपले आईबाबा प्रिय असतात. माझे आईबाबा, तुझे आईबाबा ह्यावरून त्यांच्यात कडवटपणा यायला नको. म्हणून समोरच्यांनी त्यांना योग्य आदर आणि प्रेम दिलंच पाहिजे."