सौम्यपणा धारण केलेला हा श्रावणमास एखाद्या नववधूप्रमाणे भासतो. उन्हाळ्यात ओसाड आणि अगदीच विरळ झालेल्या डोंगराला, रानाला हिरवळीने नटवून सोडणारा हा श्रावण वर्षातून महिनाभर आपल्या वाट्याला येतो आणि खूप काही शिकवून जातो. पारंपारिक पद्धती ज्या वर्षभर कुलपात बंद असतात. त्या श्रावणामध्ये आपल्याला पाहायला, जपायला मिळतात. रानभाज्यांना तर उधाण आलेलं असतं. तेरड्याच्या फुलांची रांगोळी दारात आवर्जून काढली जाते. ओसंडून वाहणारी नदी या काळात अगदी झुळझुळ वाहायला सुरुवात करते.
पावसाने जे रौद्ररूप घेतले असते ते जाऊन अगदी कृपेची रिमझिम बरसात सुरू असते. कोणी म्हणतं की या काळामध्ये देवता निद्रावस्थेत असतात म्हणजे देवांनी सुद्धा आरामदायक शयन करण्यासाठी श्रावणाचेच चयन केले आहे.