ईरा चॅम्पियन्स ट्रॉफी २०२५ मनोगत संघ कामिनी

ईरा आणि अर्थातच संजना मॅडमने या स्पर्धेचं आयोजन केलं म्हणून ही अविस्मरणीय संधी मिळाली. मॅडम तर प्रत्येक वेळी न कंटाळता शंकांचं निरसन करून मार्गदर्शन करायला तत्पर असतात. लेखनाचा अनुभव तर बरेचदा येत असतो; पण इथल्या फेऱ्यांमुळे काहीतरी वेगळं करण्याची, लिहिण्याची संधी उपलब्ध होते. प्रत्येक फेरीत माझ्याकडून उत्तम लिहिलं जाईल असा प्रयत्न केला. त्यासोबतच यावेळी ऐच्छिक फेरी होती व्हिडिओची आणि मी फारशी व्हिडिओत न रमणारी! पण प्रयत्न करूयात हा विचार करून या फेरीत भाग घेण्याचा निर्णय घेतला. व्हिडिओसाठी सोबत यायला कोणी नाही म्हणून तेही रखडलंच होतं; पण मग अचानक शेवटच्या दोन दिवसांत दुसऱ्या संघाची कप्तान असलेली माझी खास मैत्रीण अश्विनी ताई आणि मी व्हिडिओ बनवण्यासाठी जायचा विचार केला. मग काय, दोघींनीही आपापल्या संघासाठी योगदान म्हणून छानसे व्हिडिओ बनवले आणि या खास स्पर्धेसाठी खास असा वेगळा एकत्रित व्हिडिओही केला. तिथल्या तिथे ते स्क्रीप्ट बनवणं फार मजेशीर होतं. सुरुवातीला तर कोणाला काही विचारायची भीतीच वाटत होती. हा व्हिडिओ काही बनणार नाही इथपासून झालेली सुरुवात शेवटी तीन वेगवेगळे व्हिडिओ बनवून समाप्त झाली. हा आगळावेगळा पण तितकाच सुंदर अनुभव केवळ या स्पर्धेच्या निमित्ताने मिळाला. त्यामुळे खरंच मॅडमचे खूप आभार!