जांभूळ फाईल्स.. एक आख्यान भाग १

मला संगीता माझ्या वर्गात होती तेव्हापासून आवडायची. तिचा बा मात्र घारीसारखा नजर ठेवून असायचा. मी जेव्हा तिच्यासोबत बोलायचो तेव्हा कितीही लपवले तरी तिच्या बापाला बरोबर समजायचे. माझी खबर त्याला लागते कशी हेच एक कोडे होते. दररोज संध्याकाळी तो आमच्या घरी यायचा. माझा बाऽ आणि त्याचा दोस्ताना होता. हे दोघे दोस्त तंबाखू मळत गावातील राजकारणापासून ते केंद्र सरकारच्या धोरणांवर देखील अतिशय गंभीर चर्चा करीत. सरकार कसं निष्काळजी आहे.. भ्रष्टाचार कसा वाढलाय.. जिथे तिथे पैसे खाणारे, वशिलेबाज आणि घोटाळेबाज कसे आहेत... त्यांच्यामुळे नागरिकांना आपलं कर्तव्य पालन करण्यात रस उरत नाही आणि म्हणून नागरिकदेखील पैसा घेऊन मतदान करतात.... हे सर्व ते दोघेजण घरून बायकांनी \"जेवायला या\" असा निरोप देईपर्यंत बडबडत असत. त्या दोघांची मैत्री पाहून शाळेत माझ्या मित्रांनी संगीता आणि माझी जोडी जमवूनदेखील टाकली होती. " आरं तिचा बा ऽ तुझ्या बा ऽ चा जिगरी दोस्त हाय! तो तुला त्याची पोरगी हसत हसत देईल..!" या वर्गमित्रांच्या विश्वासाला जागून मला संगीवर प्रेम करावं वाटायला लागलं. वास्तविक पाहता याआधी कुणावर प्रेम करण्याचा अनुभव नसल्याने ते कसं करतात हेच मुळात ठाऊक नव्हतं. कुणाला विचारायला जावं तर ती सोय नव्हती. आमच्या गावात प्रेमप्रकरणं घडत असावीत पण ती आतासारखी उघड नसत. या बाबतीत मार्गदर्शन करू शकेल असा एक माणूस होता... आबा साखरे! साखरेसारखाच गोड.. भलताच अघळपघळ. तो पाटलाच्या शेतात कामाला होता. पाटलाच्या सोबत राहून त्यानेही अनेक प्रकरणे जवळून पाहीली होती. गावातील कुणाच्या तरी सापडलेल्या प्रेमप्रकरणात निवाडा करताना तो \"कसा \" करतात हे त्याने जवळून पाहीलेलं. त्यामुळे त्याचा सल्ला घ्यावा असं वाटू लागलं. मग मी, बबल्या आणि पश्या दुपारी शाळा बुडवून (?) पाटलाच्या मळ्यात गेलो. ऊसाच्या कडेकडेने जाताना पाटाचं पाणी वाहून चिखल झालेला होता. तो चिखल ओलांडून पलीकडे गेलो आणि बांधावर लिंबाखालीच बसलेला आबा पाहून जागीच थांबलो. आबासोबत पाटलाच्या मळ्यात काम करणारी कमळी हसत खिदळत गप्पा मारत बसलेली. आम्ही विद्यार्जन करायला गेलो आणि विद्यापीठच समोर यावं तशी गत झाली. विधात्याने हा मार्ग दाखवला आणि समोर झाडाखाली बसलेल्या त्या प्रेमसागरूला मनोमन त्रिवार वंदन करून आम्ही तो प्रेमसंवाद ऐकू लागलो. अपेक्षा इतकीच की ते चार शब्द कानांवर आले तर प्रेमाच्या परीक्षेत काही गुण मिळवता येतील!