जनजागृती पुरस्काराने उत्साह शिगेला ..!

इचलकरंजीत समावादी प्रबोधन मंडळ येथे २१ सष्टेंबरला पुरस्कार वितरणासाठी मी हजर झालो. वृत्तपत्र क्षेत्रात गेली २८ वर्ष बहुमोल कार्य करणारा वृत्तपत्र पत्रलेखक संघ समाजातील अनेक लोकांना प्रबोधनात्मक कार्याची दखल घेऊन त्यांचा सन्मान करत असतो त्यादृष्टीने त्यांनी यावर्षी सोशल मिडियाव्दारे समाजामध्ये प्रबोधन करणाऱ्या व्यक्तिंचा गौरव करण्याचे नियोजन केले होते. कोल्हापूर जिल्ह्यातून चार व्यक्तिंची निवड केली गेली यामध्ये माझे नाव पहिल्या क्रमांकामध्ये होते. कार्यक्रमांत संघटनेच्या पदाधिकारी याबरोबर शिवाजी विद्यापीठाचे माजी कुलगुरु डॉ. माणिकराव साळुंखे प्रमुख पाहुणे म्हणून उपस्थित होते. प्रास्तविक अध्यक्ष पांडूरंग पिसे तर पाहुण्यांची ओळख प्रसाद कुलकर्णी यांनी केली. उपस्थितांना मार्गदर्शन करताना कुलगुरु डॉ. माणिकराव साळुंखे यांनी वृत्तपत्र पत्रलेखक हे समाजाचे दीपस्तंभ आहेत त्यांनी सत्याची कास धरुन समाजात प्रकाश पसरवण्याचे काम करावे असे आवाहन केले. एकमेकांतील संवाद हा फार गरजेचा असून चांगल्या कामासाठी वादविवादही असावा असे मत व्यक्त केले. अनेक पुस्तकावरील मौलिक विचार आणि सोशल मिडिया यावरील दृरदृष्टीय मत यावर भाष्य केले. यानंतर त्यांच्या हस्ते पुरस्कार वितरण झाले. पाच विद्यापीठांचा अधिभार सांभाळणारे आणि विविध पुरस्कारांने सन्मानित अशा थोर विचारवंताच्या हस्ते मला ' जनजागृती पुरस्कार ' मिळाला हा आयुष्यातील श्रेष्ठ क्षण आहे. वृत्तपत्र पत्रलेखक संंघाचा २८ व्या वर्धापनास मी लिखित स्वरुपात शुभेच्छा दिल्या. हा पुरस्कार पुन्हा सामाजिक कार्य करण्यास उत्साह देणारा आहे. यासाठी गावातील भावेश्वरी परिवार , मित्रमंडळी , ईरा लेखक व लेखिका , सर्व ग्रामस्थ तसेच माझे सहृयी कुटुंब या सर्वांचे प्रोत्साहन व मार्गदर्शन खूप मोलाचे ठरले.याबद्दल सर्वांचे मनःपूर्वक आभार ..! वृत्तपत्र पत्रलेखक संघ इचलकरंजी यांनी समाजातील समाजप्रबोधन करणाऱ्या व्यक्तिंचा गौरव करुन वेगळा आदर्श निर्माण केला आहे त्याबद्दल त्यांचेही मनस्वी आभार ..!!