जन्म बाईचा भाग २७

"तुम्ही फार नशीबवान आहात, तुमचा मुलगा,सून,नातू तुमची खूप काळजी घेतो. नाहीतर मी बघा माझ्याजवळ कोणाला थांबायला वेळ नाही. सगळे फोनवरच विचारपूस करतात. ह्या वयात आपलं माणूस जवळ हवं. तुमचा नातू देखील खरंच गुणी आहे. मी रात्री खोकत होते तर लगेच पाणी पाजलं. जेवण सुद्धा दिलं, इतका विचार तर जवळच्या लोकांसाठी देखील करत नाही.
खरंच नक्कीच काहीतरी पुण्य केलं असणार तुम्ही, म्हणून तर ह्या वयात देखील सगळे तुम्हाला जपतात, नाहीतर पिकलेल्या पानाला कोण विचारतयं? तुमचं कुटूंब पाहून बरं वाटलं. आजच्या जगातही अश्या काळजी घेणाऱ्या सुना,मुलं, नातवंड आहेत हे पाहून डोळे तृप्त झाले."