जिवलगा-गोष्ट पुनर्जन्माची. भाग-56.

साधू रामानंद पुढे म्हणाले,

"मल्हार आणि निर्जराच्या मृत्यूनंतर महाबलीने सिंधुमती आणि विराटनगर ही दोन्ही राज्य आपल्या तमिराई राज्यात विलीन करून घेतली. त्या प्रचंड जलप्रलयात सिंधुमती आणि विराटनगरमधील अर्ध्याहून जास्त लोक बुडून मेले. सगळीकडे मृतदेह पाण्यावर तरंगत होते. काही कालावधीनंतर पाणी ओसरलं. त्यानंतर महाबलीने सिंधुमतीमधील घराघरातील किमती वस्तू लुटल्या. त्याचबरोबर विराटनगराचा सगळा खजानाही लुटून नेला. हा सगळा खजाना आजही तमिराईच्या एका गुप्त भुयारात अस्तित्वात आहे. त्या गुप्त भुयारात जाण्याचा एकमेव मार्ग होता. त्या भुयारात जाण्याचा एकमेव मार्ग एका कापडी नकाशावर रेखाटलेला होता. त्या नकाशाचं वैशिष्टय म्हणजे त्यावरील मार्ग दररोज बदलत होता. नकाशावर जसा मार्ग बनलेला असायचा तसाच मार्ग प्रत्यक्षात बनायचा. त्यामुळे तो नकाशा ज्याच्याकडे असेल तोच त्या खजान्यापर्यंत पोहोचू शकणार होता. महाबलीचा कोणावरच विश्वास नसल्यामुळे तो नकाशा नेहमी आपल्या सोबत घेऊन फिरत होता. त्या नकाशातील मार्गाप्रमाणे भुयारात जाऊन महाबली दररोजची कमाई स्वतः ठेऊन येत होता. काही वर्षे हा दिनक्रम सुरु होता.

पण एकेदिवशी महाबली आपल्या स्नानगृहात स्नान करत असताना त्याने तो कापडी नकाशा आपल्या अंगरख्याजवळ काढून ठेवला आणि तो स्नान करू लागला. इतक्यात 'तुफान' कबुतर तिथे आला आणि तो नकाशा घेऊन तिथून उडाला. महाबलीने ते पाहिलं आणि तो विनाअंगरखा घालताच त्याचा पाठलाग करत निघाला.

तुफान सिंधुमतीच्या दिशेने उडत होता आणि महाबली त्याच्याकडे बघत त्याचा पाठलाग करत होता. शेवटी तुफान सिंधुमतीच्या पडक्या राजवाड्यात पोहोचला आणि तिथून तळघरातील भद्रकालीच्या मूर्तीवर जाऊन बसला. त्याच्या पाठोपाठ महाबली तिथे आला. पाठोपाठ त्याचे काही सैनिकसुद्धा तिथे दाखल झाले. त्यांच्याकडील तीरकमान घेऊन महाबलीने तुफानवर निशाणा साधला आणि त्याने तीर सोडला. तुफान तिथून खाली पडून गतप्राण झाला. महाबली तिकडे धावला, पण त्याच्याकडे तो नकाशा सापडला नाही. म्हणून तो स्वतः भद्रकालीदेवीच्या मूर्तीवर चढून जाण्याचा प्रयत्न करू लागला. त्याला समोर फक्त आणि फक्त तो नकाशा दिसत होता. पण भद्रकालीची मूर्ती प्रचंड मोठी होती. शेवटी तो कसाबसा देवीच्या खांद्यावर पोहोचला. पण तिथून अचानक त्याचा तोल सुटू लागला. जणू देवी कोपून जोरजोरात उसासे टाकू लागल्यासारखं वाटू लागलं. महाबलीने देवीच्या अंगावर पाय ठेवून तिची विटंबना केली होती. त्यामुळे देवी प्रचंड क्रोधीत झाली आणि देवीचा आवाज गरजला,

"मूर्ख महाबली! तुझ्या पापाचा घडा आज भरला आहे. आजवर तू खूप पाप केलीस त्याचा दंड आज मी तुला देत आहे. पण याद राख तुझं हे पाप याजन्मी फिटणार नाही. तुला याची किंमत पुढच्या जन्मीसुद्धा चुकवावी लागेल. मल्हार आणि निर्जरा पुन्हा जन्म घेतील आणि तुझा खात्मा करतील."