जिवलगा-गोष्ट पुनर्जन्माची. भाग-61.

तन्वी तिच्या हाताची पकड आणखी घट्ट करत म्हणाली,

"बाबा माझं ऐकणार आहात की नाह? तुमचा राग स्वाभाविक आहे. पण तुम्ही स्वतः कायदा हातात घेऊन कायद्याचा भंग करू नका. इतकी वर्षे प्रामाणिकपणे देशसेवा केल्यानंतर शेवटी हा खुनाचा डाग आपल्या माथी लावून घेणार आहात का? तुम्हाला शिक्षा झाली तर आम्ही कोणाकडे पाहायचं. आज जरी तुम्ही आमच्यापासून दूर असला तरी आम्हाला तुमच्या कर्तृत्वाचा अभिमान वाटतो बाबा. आणि हाच अभिमान आम्हाला वाईट वृत्तीशी लढताना ताकत देतो.

बाबा तो अभिमान, ती ताकत आमच्यापासून हिरावून घेऊ नका. आम्हाला दुबळे बनवू नका. मेजर शेखर देशमुख हे नाव तोंडात घेतलं तरी आमच्यात असामान्य ऊर्जा निर्माण होते बाबा. त्यामुळे प्लीज रागाच्या भरात काही चुकीचं पाऊल उचलू नका. आणि राहिला प्रश्न त्या अश्विनचा! त्याला तर मी सोडत नसते. अहो बाबा! तुम्ही मला लाडाने 'भद्रकाली ताराराणी' म्हणता ना! मग ही भद्रकाली आपल्या शत्रूना कसं मोकळं सोडील! बाबा माझ्या अंगात तुमचंच रक्त आहे. असा कसा सोडीन मी त्याला. माझ्यावर विश्वास ठेवा,त्याला त्याच्या कर्माची फळं नक्की भोगायला लावणार. हा शब्द आहे तुमच्या लेकीचा."