जिवलगा-गोष्ट पुनर्जन्माची. भाग-62.

विरेन म्हणाला,

"मॅडम आम्ही आमच्या कॉलेजच्या जंगलकॅम्पसाठी त्या जंगलात गेलो होतो. तिथं गेल्यापासून आमच्याबरोबर चित्रविचित्र घटना घडत होत्या. एकदिवस आम्ही महादेव मंदिरात गेलो असता, तिथल्या एका गुहेमध्ये शिंदे सरांना आमचं अर्धवट अवस्थेत रेखाटलेलं चित्र दिसलं आणि काहीतरी विलक्षण गोष्ट त्यांच्या नजरेस पडली होती. म्हणून आम्ही त्या रात्री त्या मंदिरातील चित्राच्या शोधात बाहेर पडलो होतो. आम्ही ते चित्र शोधून काढलं आणि तिथून बाहेर पडणार तोपर्यंत अचानक तन्वी गायब झाली होती. मी तिला आजूबाजूला सगळीकडे खूप शोधलं, पण ती सापडली नाही. मग मी माझ्या चौकस बुद्धीचा वापर करून तिच्या मागावर निघालो असता मला काही अंतरावर अंधुकशी लाईट दिसली आणि तिथं काहीतरी हालचाल जाणवली. म्हणून मी पुढे गेलो असता तिथं अश्विन तन्वीवर जबरदस्ती करण्याचा प्रयत्न करत होता. तर त्याचे साथीदार माझ्यावर लक्ष ठेऊन होते. मी त्यांच्यावर अचानक हल्लाबोल केला. मी बेभान बेफामपणे त्यांच्यावर तुटून पडलो. मी त्यांना वरचढ ठरत होतो, त्यामुळे ते घाबरून गेले होते. तन्वी आता आपल्या हाताला लागत नाही ही गोष्ट अश्विनला समजली आणि त्याने तन्वीला दरीच्या दिशेने फरफटत नेलं. मी त्याच्यावर चालून जाणार तोच त्याने तन्वीला दरीमध्ये फेकून दिलं. तिच्यापाठोपाठ मीही उडी घेतली. सुदैवाने खाली दीड दोनशे फूट अंतरावर पाणी होतं, त्यामुळे आम्ही त्या पाण्यात पडल्यामुळे बचावलो. नंतर आम्ही रस्ता चुकल्यामुळे काही दिवस जंगलात भटकत होतो. मग एकेदिवशी आमच्या शोधात आलेल्या शिंदे सर आणि बचावपथकाची आणि आमची भेट झाली. ते आम्हाला सुरक्षित आपल्यासोबत घेऊन आले."