जिवलगा-गोष्ट पुनर्जन्माची. भाग-65

अश्विनला त्याच्या कृत्याची शिक्षा तर झाली, पण त्याच्यामुळे तन्वी आणि विरेनला जो त्रास सहन करावा लागला, जे सोसावं लागलं त्याची भरपाई होणार नव्हती. पण सगळा नियतीचा खेळ मानून त्यांनी ते सगळं मागे टाकलं आणि आपल्या घराकडे ते परत निघाले.

अश्विन प्रकरण तर निकाली लागलं पण आता परीक्षा तोंडावर आल्या होत्या. जंगल कॅम्पला गेल्यापासून विरेन आणि तन्वीच्या आयुष्यात खूप काही उलथापालथ झाली होती. त्यातून सावरून अभ्यास करून परीक्षा देण्याचं दिव्य त्यांना पार पाडायचं होतं. ते दोघेही जातिवंत हुशार असल्यामुळे त्यांना ते नक्कीच जमण्यासारखं होतं. पण आणखी एक गोष्ट विरेनच्या डोक्यात घोळत होती. ती म्हणजे जंगलात त्यांनी जे काही पाहिलं त्या गोष्टीचा छडा लावणे. पण त्यासाठी खूप मोठं नियोजन आवश्यक होतं. तूर्तास ती गोष्ट फक्त विरेन आणि तन्वी यांच्या मनात दडपून ठेवलेलं गुपित होतं. पण लवकरच ते जगासमोर आणणंही गरजेचं होतं. पण तूर्तास फक्त परीक्षेवर लक्ष केंद्रित करणं हेच एक ध्येय त्यांच्यासमोर होतं.