*जेनेटी ट्रेन*

ही घटना १४ जून १९११ मध्ये इटलीमध्ये घडली होती. त्याकाळी जेनेटी रेल्वे कंपनीने आकर्षक अशी तीन डब्यांची एक ट्रेन बनवली होती. त्या ट्रेनच्या इंजिनपासुन तर डब्यांपर्यंत सर्व काही नविन होते. जेनेटी कंपनीने प्रयोग म्हणून या ट्रेनने प्रवाशांना मोफत प्रवास करण्याची सुवर्णसंधी उपलब्ध करून दिली. त्यासाठी त्याकाळी त्यांनी वर्तमानपत्रात जाहिराती देखील दिल्या होत्या. सर्व सुखसोयीयुक्त नव्याकोऱ्या ट्रेनने प्रवास करण्यासाठी शंभर प्रवाशांची निवड करण्यात आली. त्यासोबतच सहा रेल्वे कर्मचारी त्यांच्या दिमतीसाठी नेमण्यात आले. जय्यत तयारीनिशी इटलीच्या रोमन स्टेशनवरून एकशे सहा प्रवासी घेऊन ही ट्रेन निघाली. काही मिनिटांतच रेल्वेने वेग धरला. थोडेसे अंतर पार करून ही ट्रेन एका बोगद्यात शिरली, पण बराच वेळ झाला तरी बाहेर आली नाही. पुढील स्टेशनवर रेल्वे कर्मचाऱ्यांसह काही प्रवासी ट्रेनची वाट पाहात होते, पण त्या ट्रेनचा कुठेच मागमूसही नव्हता. तिला बोगद्यात शिरताना बऱ्याच लोकांनी पाहिले होते. त्यामुळे ती आतच अडकून पडली असेल किंवा खराब झाली असेल असा प्रथमदर्शनी अंदाज लावण्यात आला. त्यासाठी बचाव पथकाला पाचारण करण्यात आले. त्यांनी बोगद्यात शिरून पाहणी केली. पण ते सारे अचंबित झाले. संपूर्ण बोगदा पिंजून काढला तरी त्यांना आत काहीच सापडले नाही. प्रवाशांसह ट्रेन अचानक गायब कशी झाली म्हणून सर्वांच्या मनात संभ्रम निर्माण झाला. बरीच शोधाशोध केल्यानंतर त्यांना काही अंतरावर त्या ट्रेनमधील दोन प्रवासी वेडसर अवस्थेत आढळले. झालेल्या घटनेबाबत ते दोघे बोलण्याचा मनस्थितीतच नव्हते. उपचारासाठी त्यांना सरकारी रुग्णालयात दाखल करण्यात आले. उपचारादरम्यान एका प्रवाशाने या घटनेबद्दल काहीही कथन करण्यास नकार दिला. दुसऱ्या प्रवाशाने मात्र जे काही सांगितले त्यातून अजूनच गुंतागुंत वाढली. त्याने दिलेल्या माहितीनुसार ट्रेन बोगद्यात शिरताच अचानक तिथे पांढरा धूर निघायला लागला. त्या धुरात कुणीही कुणाला दिसत नव्हते. म्हणून घाबरून त्या दोघांनी त्या ट्रेन मधून बाहेर उडी टाकली. पण त्यानतंर ट्रेन कुठे गेली हे त्यांना देखील समजले नाही.