ज्युलिया राघव शास्त्री ७

बर्फाचे दिवस ओसरत आले होते, तरी सुद्धा थंडी तशी खूप होती. काहीच दिवसात राघव भारतात परत जाणार होता. त्या आधी सहज फिरायला म्हणून तो बाहेर पडला. तो बाजूला जवळपास दीडशे किलोमीटर असलेल्या एका दुसऱ्या गावात फिरायला म्हणून आला होता. बाहेर गर्दी तशी फार नव्हती. बरीच दुकानं मिळून एक मोठा शॉपिंग एरिया पसरला होता. तिथेच तो पायीपायी फिरत होता. तो समोर दिसणाऱ्या लोकांच्या चेहऱ्यावरील भाव वाचत, इकडे तिकडे बघत फिरत होता. तेवढयात त्याचे लक्ष पलीकडील लेन कडे गेले, तर ज्युलिया मागे मागे बघत, पुढे पळत होती. कोणीतरी तिचा पाठलाग करत आहे, हे त्याच्या लक्षात आले. तिला बघून आधी तर त्याने दुर्लक्ष केले, पण क्षणात त्याची पावले आपोआप तिच्याकडे वळली. तिचा हात पकडत त्याने तिला आपल्याकडे एका कॉर्नरमध्ये ओढले.