ज्युलिया राघव शास्त्री ३

इकडे लग्नासाठी ज्युलियाची तयारी सुरू झाली आणि तिकडे बाहेर सनई, चौघडा, बँडचे ताल सुर वातावरणात गुंजू लागले. जिथे या सनईच्या आवाजाने नवरदेवाच्या आनंदाला उधाण आले तर ते ऐकून नवरीबाईच्या हृदयाची धडधड वाढली. ज्युलिया जरी एक सेलिब्रिटी असली तरी शेवटी ती एक मुलगीच होती आणि इतर मुलींप्रमाणे लग्न हे खूप मोठे स्वप्न होते. जवळजवळ ते तिला अशक्यच वाटत होते आणि आज तिचे तिने बघितलेले सर्वात सुंदर स्वप्न पूर्ण होणार होते. अगदी परिकथेसारखी तिची कथा सुरू होती. तिचा राजकुमार तिला घ्यायला येणार होता. पुर्ण जगासमोर तो तिच्या गळ्यात मंगळसूत्र बांधून तिचा स्वीकार करणार होता. तिचा मानसन्मान आणखी वाढणार होता.