ज्युलिया राघव शास्त्री १० ( समाप्त)

चांगले काम केले, दुसऱ्यांना मदत की आपल्यासोबत चांगलेच होते, राघवच्या मैत्री नंतर तिचा त्यावर गाढ विश्वास बसला होता. याचीच प्रेरणा घेत तिने तिचे एन जी ओ सुरू केले, ज्यात अनाथ, बेघर मुलींना मदत केली जात होती. तिच्या भुतकाळामुळे तिच्यासोबत कोणी लग्न करणार नाही, हे माहिती होते. तिने पण तसे लग्नाचे स्वप्न बघणं सोडून दिले होते. त्यामुळे तिला काही मुली दत्तक घेण्याची इच्छा झाली होती, पण ती भारतीय नसल्यामुळे, मुल दत्तक घेण्यासाठी तिला परवानगी मिळत नव्हती म्हणून मग तिने सरळ मुलींचे शिक्षण, नोकरी, लग्न सारख्या जबाबदाऱ्या घेणे सुरू केले. इकडे कामात खूप मेहनत करायची आणि तिकडे अनाथ गरजू मुलींसाठी राबायचे, राघव सोबत थोडा वेळ घालवायचा, असे तिचे आयुष्य सुरु होते.

ज्युलियाच्या या चांगल्या कामांची नोंद आता मीडियावाले घेऊ लागले होते. त्यामुळे आता लोकांसमोर तिची एक चांगली इमेज तयार होऊ लागली होती. एक्टिंगमध्ये तिचे काम ओळखले जाईल, असे छान छान भूमिका तिला मिळत होत्या. आता ती चांगलीच प्रसिद्ध झाली होती. आता तिला तिच्यासाठी बॉडीगार्ड ठेवावे लागले होते. पण अधूनमधून चेहरा बांधून ती राघव सोबत बाईक वरून फिरायला जात होती.