ज्याचं करावं भलं.. 4 अंतिम

"हे बघ संगीता, तुझी सासू जशी डस्टबिन आहे तशीच तुझी आई देखील डस्टबिन आहे हे तू विसरू नकोस. तू तुझ्या सासूचे केलेस तर उद्या तुझीच भावजय तुझ्या आईचे करणार. नाहीतर तुझे शिकून तुझ्या आईसोबत ती देखील तसेच वागायला लागली तर तुला ते आवडेल का? तुझ्या आईला कोणी डस्टबिन म्हटलं तर तुला चालेल का? तुझ्या सासूचे आणि माझे वय एकच आहे मग मी सुद्धा डस्टबिनच झाले ना? शिवाय मी मुलांच्या म्हणजेच तुझ्या भावाच्या आणि वहिनीच्या आयुष्यात लुडबुड केली आणि तुझी वहिनी मला काहीतरी बोलली किंवा ती टोचून बोलू लागली, तुझा दादा काहीतरी म्हणाला तर ते तुला आवडेल का? मग तसेच तुझ्या सासूचे पण आहे गं. तिलाही काहीतरी वाटतच असेल ना? आता या वयात स्त्रियांना काय हवे असते? इतकी वर्ष त्यांनी आपल्या संसारात स्वतःला झोकून दिलेलं असतं आणि या वयामध्ये आपल्या सुनेने, आपल्या मुलाने आपल्याशी दोन शब्द बोलावे, आपली विचारपूस करावी, दिवसभराच्या घडामोडी आपल्याला येऊन सांगाव्यात इतकीच काहीतरी तिची अपेक्षा असते. बाकी तिने आत्तापर्यंत घरासाठी केलेलं असतं आणि या वयातही ती घरासाठी करत असते त्यामुळे तू आता इतर कोणाला ह्या असल्या गोष्टी सांगत बसू नकोस. जा आता आणि तुझ्या सासूला काही हवं नको ते पहा. तशीही त्यांची तब्येत बरी नाही त्यामुळे तू त्यांना खायला, प्यायला काहीतरी द्यावं. मला माहित आहे त्यांनी तुझ्यासाठी खूप काही केलं आहे आणि आता तुला संधी आहे त्यांच्यासाठी तू करावंस. त्यामुळे हा वेडेपणा सोडून दे आणि त्यांच्यासाठी जेवढं करणं शक्य आहे तेवढं सगळं तू कर. तुझ्या नवऱ्यालाही चार समजुतीच्या गोष्टी सांगून त्यांनाही त्यांच्या आईसोबत चांगलं वागण्याची तू प्रेरणा द्यावीस की त्यांनाही तुझ्या या कारस्थानामध्ये ओढवून घेतेस! हे मला अजिबात पटले नाही. पुन्हा जर अशी कोणती गोष्ट माझ्या कानावर आली तर बघ." असे म्हणून आईने संगीताला चार समजुतीच्या गोष्टी सांगितल्या आणि तिची कान उघडणी केली. तेव्हा मात्र संगीताला खूप वाईट वाटले.