का एक झाले ऊन आणि सावली ?(भाग ३ रा)

श्रीधरचा विषय निघताच ती पुन्हा हळवी झाली.

'किती अभिमानाने बाबा सांगत होते नातेवाईकांना की लाखमोलाचा जावई मिळाला आहे त्यांना. तुझ्या सोबत लग्न जमल्यानंतर आभाळाएवढा आनंद झाला होता त्यांना.फक्त उच्चशिक्षित नाही तर सद्गुणी नवरा मिळाला आहे तुला असे किती अभिमानाने म्हणायचे बाबा. तु ही तसाच होतास ना.माझी प्रत्येक पडती बाजू सावरून घेणारा.पण जेव्हा मी पूर्णपणे कोलमडले तेव्हा साथ तर नाहीच निदान मदतीचा हात देवून माणुसकी का नाही दाखवलीस ? त्याने शरीरावर बलात्कार केला आणि तु मनावर. तुझ्याबद्दल काहीच वाटत नाही मला. पण जेव्हा आईबाबांना हे कळेल तेव्हा त्यांची काय अवस्था होईल ही कल्पनाही असहनीय होते.' ती पुन्हा आपल्याच विचारत रमली. सविताताईंच्या नजरेतून मात्र ते सुटले नाही.