का रे दुरावा भाग १

गंधार वकील होता.  कामानिमित्त तो सोनपूरला डिस्ट्रिक्ट कोर्टात सरकारी वकील म्हणून कार्यरत होता. वर्षभरापूर्वीच त्याची मुंबईहून अनिश्चितकालाकरीता बदली झाली होती म्हणून त्याने सोनपूरमध्येच  गावातील पोस्टाच्या बाजूला एक बंगलावजा घर खरेदी केले.  गावात राहणारी रखमा त्याच्याकडे घरकाम करायला यायची  आणि त्याबरोबर गावातील इत्यंभूत माहितीही त्याला न मागताच पुरवायची.  आठ दिवसापूर्वी त्याच्या घरासमोरील  घरात अरुंधती राहायला आली.   परमेश्वराने भरभरून सौंदर्य तिला दिले होते. चाफेकळीसारखे नाक....हरणासारखे डोळे.... काळेभोर...लांबसडक केस....संगमरवरासारखी तुकतुकीत कांती आणि हे सर्व कमी होते म्हणून नाजूक मंजुळ आवाज!