कालचक्र भाग-१

काळोख्या रात्रीच्या अंधारात रातकिड्यांची किरर्ऽऽऽ काळजात चिरून जात होती. त्यात सळसळत्या पानांच्या आवाजासोबत दम टाकत जीवांच्या आकांताने पळणारे ती दोघं आणि ते.... घुबडांचा आवाज अन् भयानक वास्तव्य त्या जंगलात, त्यात गेल्यावर जीवंत बाहेर पडू की नाही याची कल्पना नसतानाही ती दोघं मिळेल ती वाट पकडून जीव मुठीत घेऊन धावत होते. अचानक भयंकर एका किंकाळीने त्या साम्राज्यात शांतता पसरवली अन् तिला अचानक जाग आली. घामजलेल्या शरीराने ती थोडी थरथरत उठली. बाजूला पाण्याची बाटलीतून थोडं पाणी प्यायली. श्वास जास्त चढलेला अन् डोकं आज परत सुन्न झालं होतं. तिच्या सोबत काय घडतंय तिला ठाऊक नव्हतं अन् अशा स्वप्नाला ती वैतागून ही गेली होती. अनेकदा तिची सकाळ या स्वप्नाने पूर्ण व्हायची अन् तो दिवस तिचा रहस्यमयी जायचा.