काली - एक रहस्य! ( भाग ५, अंतिम भाग )

" आजपासून ही काली जगातून नाहीशी होणार आहे, पण ही काली कशी होती याच्या कथा तुला बरेच जण सांगतील. एक गोष्ट लक्षात ठेव बाळा, जेव्हा तू मोठी होशील आणि तुला आजूबाजूला काही वाईट घडताना दिसत असेल, तेव्हा मात्र कालीचं रूप घ्यायला कचरायचं नाही. अन्याय सहन करायचा नाही आणि आपल्या डोळ्यांसमोर कोणावर अन्याय होताना दिसत असेल तर ते पाहत बसायचं नाही. अन्यायाविरुद्ध लढा द्यायचा आणि जिंकून दाखवायचं. तुझ्या आईसारख्याच कितीतरी मुली मी मागे सोडून चालली आहे, पण माझाही नाईलाज आहे. आईला दिलेलं वचन मला पूर्ण करावंच लागेल. तुला मात्र घडायचं आहे. इतरांना घडवायचं आहे. तू मुलगी आहेस म्हणून कमजोर पडायचं नाही. मजबूत उभी राहून पुढे चालत राहायचं. तुझी आई बघ, किती स्ट्रॉंग झाली आहे. तसंच तुलाही व्हायचं आहे. आलेल्या अनुभवातून तुझी आई तुला नक्की घडवेल, याची मला खात्री आहे. चल, जरा जास्तच बोलत बसले मी. आता मला निघायला हवं. " काली हळव्या स्वरात तिच्याशी बोलत होती.