कशी मी राखु तुमची मर्जी भाग 3 अंतीम

वीणाचे लग्न झाले.सहा वर्ष उलटली पण पाळणा हलला नाही.तिला मुलीची खूप हौस.सातव्या वर्षी चाहूल लागली बाळाची.ती खूप आनंदली.तिनी सुंदर क्रोशाचा लोकरीचा फ्राॅक विणला .पण मुलगाच झाला.एवढे वर्षांनी झाल्यामुळे खूप कोडकौतुक होतेच. पण मुलीची हौस अपुर्णच राहिली.
निरज एक वर्षाचा झाला.
तो माहेरचा सांगावा आला.
तिच्या धाकट्या भावजयीचे वैशालीचे डोहाळजेवण होते.ती दोघेही छोट्या निरजसह गेलेत.कार्यक्रम आटोपला की निघू लगेच.पण डोहाळजेवणाचा कार्यक्रम झाला आणि रात्रीच वैशालीला कळा येऊ लागल्या म्हणून दवाखान्यात नेले.वीणाच सोबत होती. वैशालीला मुलगी झाली.नर्सने बाहेर आणून वीणाकडे दिले तर तिचं गोंडस रुपडं न्याहाळत वीणा भावाला म्हणाली," मी हिला सुन करून घेईन. "
गोष्ट गमती गमतीत तिथेच संपली.
भाऊ कंपनीत नोकरीवर.त्याची सतत बदली व्हायची.मुलीच्या शिक्षणासाठी म्हणून पुण्यात स्थायिक झालेत.
एकुलती एक मुलगी.त्यात घरी कशाचीच कमी नाही.ती लाडाकोडात वाढत होती.लक्ष्मी आणि सरस्वती दोन्ही प्रसन्न होत्या.ती बोलता बोलता इंजिनिअर झाली.एक चांगल्या आयटी कंपनीत नोकरीला लागली.आता तर तिच्या हातात स्वतःचा पैसा खुळखुळत होता.
त्याच कालावधीत निरजचं इंजिनिअरिंगचा शिक्षण पुर्ण होऊन तो एमबीए करायला पुण्यात गेला होता.त्याचे मामाचे घरी अधूनमधून जाणेयेणे व्हायचेच.
पण निरज सुरवातीपासूनच अगदी शांत स्वभावी आईसारखा.
कधी कधी मामाकडे एखाद दिवस मुक्कामाला असायचा.तेव्हा त्याने नेहाचे उच्छृंखल वागणे बघितले होते.तिचं पोरकटपण तो बघत होता.
निरजही शिक्षण संपवून एका चांगल्या कंपनीत नोकरीला लागला होता.सगळं स्थिरस्थावर झालं होतं.आता त्याचे दोनाचे चार हात करून द्यावे म्हणून वीणा,विवेकने त्याला तसे सुचित केले.वधुसंशोधन सुरु झाले.