कलम तीनशे चोपन्न भाग १०

रश्मीने आपले एकेक प्रश्न विचारायला सुरुवात केली. विवेक उत्तरे देत होता.
विनयभंगाच्या तक्रारीबाबत रश्मी बारकाईने चौकशी करत होती. त्यावेळी तिच्या मनात एक प्रश्न आला, तो तिने बोलून दाखवला.
" या सगळ्या प्रकरणात पोलीस शहाला सामील असतील का? पैसे चारुन त्याने अशी खोटी केस केली असेल का?"
यावर विवेक म्हणाला,
" हो. तसेही होऊ शकते. ते काही नवीन नाही; पण शहाने त्या बाईचे प्यादे इथे उभे केले आहे. वरवर पाहता साकेतने त्या बाईचा विनयभंग केला आहे अशी केस आहे. या केसमध्ये साकेतला गुंतवून त्याच्यावर दडपण आणायचे आणि त्याला जमीन विकायला भाग पाडायचे हा या मागचा खरा डाव आहे. यासाठी त्याने साकेत वर बारीक लक्ष ठेवले होते. तो कधी गावी गेला होता याची माहिती त्याला होती. अंदाजपंचे तारीख दिली असती तर साकेतचे कंपनीतील थंब पंचिंग पुरेसे झाले असते. त्यावरुन साकेत त्यादिवशी कंपनीतच होता हे सिद्ध झाले असते. यासाठी त्याने साकेतवर पाळत ठेवून तो गावी नेमका कोणत्या दिवशी गेला होता ते पाहून त्या तारखेची विनयभंगाची तक्रार दाखल केली आहे. त्यादिवशी आपण गावी गेलो नव्हतो असे साकेत म्हणूच शकत नाही हे त्याला माहीत होते. केस खोटी असली तरी प्रथमदर्शनी व परिस्थितीजन्य पुरावा पाहिला जातो. त्यात महिलांवर अत्याचार होतो म्हणून पुराव्याकडे फारसे लक्ष न देता महिलांची तक्रार नोंदवून घ्यायची असा कायदा केलेला आहे. याची शहानिशा कोर्टात होते. खोटी नोकेस असेल तर कोर्टात ते शाबित होते व आरोपीची निर्दोष सुटका होते.
खूपदा गुन्हा केलेले आरोपीही सबळ पुराव्याअभावी निर्दोष सुटतात. त्यामुळे काळजी करु नका वहिनी. साकेतवर काही बालंट येऊ देणार नाही मी." विवेक म्हणाला. रश्मी विवेकाचे बोलणे अगदी लक्षपूर्वक ऐकत होती. ते ऐकत असताना तिच्या मनात एक प्रश्न आला. ती तो प्रश्न विवेकला विचारणार होती, तेवढ्यात विनिता जेवायला चला म्हणून बोलवायला आली. त्यामुळे रश्मीने तो प्रश्न विवेकला विचारला नाही. हसतखेळत त्यांचे जेवण झाले. आतमध्ये विनिताचे
स्वयंपाकघर आवरणे चालू होते म्हणून रश्मी तिथेच बसली होती. दरम्यान दोघींमध्ये कौटुंबिक गप्पा सुरू होत्या; पण मनात आलेला प्रश्न रश्मीला विवेकला विचारायचा होता म्हणून तिची चुळबुळ सुरू होती. मुले झोपाळ्यावर बसून मजेत झोका घेत होती. त्या झोक्यागणिक रश्मीचे हृदय धडधडत होते. पुढे काय होईल हा प्रश्न डोक्यात थैमान घालत होता.
क्रमशः ©® सौ.हेमा पाटील.
कुठला प्रश्न रश्मीला पडला होता? त्यावर काय उत्तर दिले विवेकने? हे जाणून घेण्यासाठी पुढील भाग वाचा.