कलम तीनशे चोपन्न भाग १४

या इन्स्पेक्टर दळवी यांच्या म्हणण्यावर जिल्हाप्रमुख म्हणाले,
" ते तुम्ही मला शिकवू नका. मी या पदावर माशा मारायला बसलो नाही. एक काम करा. या केसचा तपास करताना सावर्डे गावातील गुन्हा घडला आहे असे दाखल केलेल्या तारखेचे सीसीटीव्ही कॅमेऱ्याचे बॅकअप चेक करा. तसेच त्या संपूर्ण दिवसाचे साकेत देशमाने यांचे मोबाईल लोकेशन चेक करा. त्या वेळेत ते त्या ठिकाणी खरोखरच होते का? याची खात्री करून घ्या. जर ते त्या वेळी तेथे नाहीत अशी तुमची खात्री झाली तर मात्र साकेत देशमाने यांच्यावर गुन्हा दाखल करून त्यांना कोर्टासमोर हजर करू नका. त्याऐवजी हा पुरावा कोर्टासमोर दाखल करून संबंधित व्यक्तीने खोटी केस दाखल केली आहे असे कोर्टासमोर सांगा. संबंधित फिर्यादी पार्टीवर खोटी केस केल्याबद्दल पोलिसांतर्फे गुन्हा दाखल करा. यासंदर्भात लवकर तपास करा."
यावर इन्स्पेक्टर दळवी म्हणाले,
" पण साहेब एवढे सगळे करेपर्यंत जर ते निर्दोष असतील तर कोर्टात ते शाबित होईलच ना?"
यावर जिल्हाप्रमुख म्हणाले,
" मी सांगतोय ते काम करा. तुम्ही खूप आळशी झाला आहात. तुमची विदर्भात बदली करण्याची वेळ आली आहे याची मला खात्री पटली आहे.
म्हणजे तुमचे असे म्हणणे आहे की; त्यांनी कोर्टाचे हेलपाटे घालावेत. त्यांनी स्वतःला निर्दोष सिद्ध करून घेण्यासाठी वकिलाकडे जावे, आणि त्रास सहन करून स्वतःला निर्दोष सिद्ध करून घ्यावे. परंतु थोडा त्रास घेऊन तुम्ही मात्र तसा तपास करणार नाही." हे ऐकल्यावर इन्स्पेक्टर दळवी गडबडले.
" नाही नाही साहेब, मला तसे म्हणायचे नव्हते."
" मग कसे म्हणायचे होते?" असे जिल्हाप्रमुख म्हणाले.
" मी आजच्या आज तपासाला सुरुवात करतो साहेब." असे इन्स्पेक्टर दळवी म्हणाले.
" काय तपास केला आहे त्याची एक प्रत आमच्या कार्यालयात पाठवून द्या." असे जिल्हाप्रमुखांनी सांगितले.
" हो साहेब, पाठवतो." असे दळवी म्हणाले तेव्हा जिल्हाप्रमुखांनी फोन ठेवला. फोन स्पीकरवर ठेवलेला असल्यामुळे जे काही बोलणे झाले ते सगळे रश्मीने ऐकले. त्यामुळे तिला धीर आला. मनाला विश्वास वाटला की, आपण येथे आल्यामुळे काहीतरी होऊ शकते. जिल्हाप्रमुखांचे तिने आभार मानले.
"आपल्यासारखे अधिकारी असतील तर आमच्यासारख्या सर्वसामान्य व्यक्तींना घाबरण्याची काही गरज नाही. आपले खूप खूप धन्यवाद!" यावर जिल्हाप्रमुख म्हणाले,
" जनतेची सेवा करणे हेच आमचे काम आहे. मी वेगळे काही करत नाही. आमच्या खात्याची इमेज बिघडली आहे. याला अनेक अधिकारी कारणीभूत आहेत. खालपासून वरपर्यंत भ्रष्टाचाराने पोलीस खाते पोखरलेले आहे. आम्हाला जेवढे करता येते तेवढे आम्ही करत असतो." हे ऐकून रश्मी पुढे काही बोलली नाही. त्यांचे पुनश्च एकदा
आभार मानले व ती बाहेर पडली.