कानपिचक्या भाग ४

जेवायला ताटे करण्यात आली. सर्वांनाच एकदम जेवायला वाढून घेतले होते. पुरणपोळीचा बेत होता. ताटे होतील तशी सगळ्यांच्या पुढ्यात ठेवली जात होती. सगळ्यांची ताटे पोहोच झाली. आता जेवायला सुरुवात करणार तोच निशाला सासुबाईंच्या पुढ्यात दोन पोळ्या दिसल्या. तिने लगबगीने उठून त्यांच्या ताटातील दिड पोळी काढून घेतली व ताटाला फक्त अर्धी पुरणपोळी ठेवली. आईचा चेहरा झर्रकन उतरला हे स्नेहाच्या लक्षात आले. पण, पाहुण्यांच्या घरी, तेही निशाच्या माहेरी काय बोलणार? म्हणून ती गप्प बसली. तिने आपल्या पुढ्यातील एक पुरणपोळी काढून ठेवली.