कांतारा २

विकृती जेव्हा वाढते तेव्हा त्याला आळा घालण्यासाठी देव हा अवतरतोच. कोणत्या रुपात येणार? कधी येणार? कसा येणार? हे माहीत नसतं. नायकाची जेव्हा एन्ट्री झाली तेव्हा दर्शकांनी उत्स्फूर्तपणे प्रतिसाद दिला, तेव्हाच वाटलं सुरवात अशी आहे तर चित्रपट देखील जबरदस्त असणार, तसंच झालं. नायकाची भूमिका इतकी जबरदस्त आहे की, बस बघतच राहावी. कळकट मळकट कपडे, वाढलेले केस, पिवळे दात. कधी वाटलं देखील नव्हतं की हिरो असा असेल, पण ह्या चित्रपटात हेच तर खास आहे. वरवर दिसण्यावर काहीच नसतं, गुण महत्वाचे असतात. बरं ज्या पद्धतीने चित्रपट दाखवला आहे अंगावर काटा आल्याशिवाय राहणार नाही.
काही दृश्य मन हेलावून टाकतात. चित्रपटाचे संगीत देखील अप्रतिम आहे. त्यामुळे चित्रपट पाहणारा मंत्रमुग्ध होतो. काय दाखवलं आहे चित्रपटात? देवावर श्रद्धा, सूडाची भावना, शोषण, ताकद, धैर्य असं बरंच काही सुंदर पद्धतीने गुंफलं आहे.
सुरवातच अशी आहे की, दर्शक स्तब्ध होतो. का स्तब्ध होतो? ते पाहिल्यावर कळेलच.
वो.... अशी जी किंकाळी अभिनेत्याच्या तोंडून ऐकायला येते तेव्हा मात्र अंगातून वीज चमकून जावी असंच होतं. आजवर पाहिलेल्या उत्तम चित्रपटापैकी असा हा चित्रपट आहे.
उत्तम अभिनय, डायरेक्शन सारं काही उत्तम आहे. फायटिंग असो वा विनोद मनाला भुरळ घालणारा असा चित्रपट आहे.
ज्या पद्धतीने चित्रपटाची कहाणी पुढे सरकते, तसतसे पुढे काय होणार ह्याची उत्सूकता लागून राहते. शेवट देखील इतका सुंदर आहे की बस पैसे वसूल झाल्याची भावना येते.