क्षण मोहाचा काळ प्रीतीचा भाग ३

पुण्यातील बाणेर रस्त्यावर उभ्या असलेल्या त्या चकाकत्या 'ओरियन टॉवर्स'च्या भव्य प्रवेशद्वारासमोर साक्षी उभी होती. 'नर्मदा सदन'च्या जुन्या वास्तूतून ती थेट भविष्यातील एका जगात आली होती. १९ व्या मजल्यावर जाणाऱ्या लिफ्टमध्ये असताना तिला स्वतःच्या हृदयाचे ठोके स्पष्टपणे ऐकू येत होते. लिफ्टचे दरवाजे उघडले आणि समोरचं दृश्य पाहून ती क्षणभर थबकलीच. चोहोबाजूंनी काचेच्या भिंती, लॅपटॉपवर वेगाने फिरणारी बोटं, कानाला हेडफोन्स लावून गंभीर चेहऱ्याने बोलणारे लोक आणि हातात कॉफीचे मग घेऊन घाईघाईने चालणारे कर्मचारी.हे सर्व तिच्यासाठी अगदी नवीन होतं.