छत्रपती शिवाजी महाराजांना पत्र

खरं सांगू, शिवजयंती किंवा राज्याभिषेक सोहळा यांसारख्या दिवशी लहानथोरांचा उत्साह पाहून माझ्याही मनाला अर्थातच चांगलंच वाटतं. तरीही या सगळ्यात अचानक जाणीव होते की हे सर्व तर फक्त आजच्याच दिवसासाठी आहे ना! ते जे उत्साहाचं उधाण आलेलं असतं ते दुसऱ्या दिवशीपासून तर पार रसातळाला गेलेलं असणार. बरं आणि उत्साह तरी काय असतो? पारंपरिक पद्धतीने तयारी करून मिरवणं आणि त्या शोभेला समाज माध्यमांवर सजवणं! वर्षभरात इतर दिवशीही कपाळी चंद्रकोर असलेलेच काय ते खरे मावळे किंवा शिवकन्या, शिवरायांसारखी दाढी वाढवून फिरणारे ते शिवभक्त, गाड्या किंवा इतर मालमत्तेवर राजेंच्या नावाचा वापर, हे आणि असं किती कायकाय सुरू असतं. खरं सांगा राजे, तुम्ही या नावाचे आणि शोभेचे भुकेले आहात? मला तर असं वाटत नाही.