इंदिरा गांधीजींना पत्र!

आदरणीय इंदिराजी,
सा. न. वि. वि.
तुमच्या सारख्या कणखर व्यक्तिमत्त्व असलेल्या स्त्रीला माझा मानाचा मुजरा. पत्र लिहिण्यास कारण असे की, आज तुमचा वाढदिवस त्यासाठी खूप शुभेच्छा आणि शाळेत असताना 'पिता के पत्र' ह्या पुस्तकाचा मराठीत अनुवाद असलेले पुस्तक मी शाळेच्या ग्रंथालयातून नियमानुसार माझ्या नावावर एका आठवड्यासाठी वाचण्यास निवडले होते त्याबद्दल सांगायचे होते. खर तर विविध कथा वाचणारी मी पहिल्यांदाच पत्रांचा संग्रह असलेले हे पुस्तक वाचत होते. ३० पत्रातून तुमचे आणि तुमच्या वडिलांचे नाते किती घनिष्ठ होते हे त्यातून उमगले. शक्यतो पत्रात खुशाली कळवतात,पण तुमच्या पत्रात तुमचे वडील दूर असूनही अमूल्य असे कधी पृथ्वीबद्दलचे ज्ञान तर कधी विविध विषयांवर माहिती देणारे एक शिक्षकच भासत होते. जणू तुमच्या दोघांचा प्रत्यक्ष समोर होणारा संवाद आहे असेच वाचतांना वाटत होते. त्यावेळेस तुमचे वय लहान असूनही तुमची जिज्ञासू वृत्ती आणि आपले वडील महत्त्वाच्या कामासाठी म्हणजेच देशासाठी आपल्यापासून दूर आहेत ह्याची समज तुम्हाला त्या वयात होती, ह्याचे विशेष वाटते.

तुम्ही राजकारणी तर होताच पण त्या आधी एक आज्ञाधारक मुलगी होता. प्रत्येक गोष्टींचे बारकावे आणि निरीक्षण करण्याचा स्वभाव अनेक धाडसी निर्णय घेण्यात नक्कीच कामी आला असेल, हे तुमच्याबद्दल जाणून घेताना समजले. तुमचा अंतराळवीर राकेश शर्मा ह्यांच्याशी संवाद साधतानाचा कृष्ण-धवल असलेला व्हिडिओ आणि त्यातून त्यांनी दिलेले 'सारे जहासे अच्छा' हे उत्तर ऐकताना अंगावर काटाच आला.