भांडणार्‍यावर पण प्रेम करा !....

प्रत्येक माणूस वेगळा असतो. त्याचा स्वभाव, विचार, भावना, अनुभव, संस्कार, वेदना, स्वप्नं सगळंच वेगळं असतं. म्हणूनच दोन माणसांमध्ये मतभेद होणं हे अगदी स्वाभाविक आहे. जिथे दोन माणसं असतात, तिथे दोन मतं असतात, आणि जिथे मतं असतात तिथे भांडण होणं अटळ असतं. पण आपण भांडणाकडे नेहमी नकारात्मक नजरेने पाहतो. जणू भांडण म्हणजे नातं तुटण्याची सुरुवात, जणू भांडण म्हणजे प्रेम संपल्याची खूण. खरं तर भांडण म्हणजे नात्याचं अपयश नसून, ते नातं जिवंत आहे याचं चिन्ह आहे. जिथे प्रेम असतं तिथे अपेक्षा असतात, आणि जिथे अपेक्षा असतात तिथे दुखणं असतं. हे दुखणं मनात साठून राहतं, आणि एक दिवस शब्दांच्या रूपाने बाहेर पडतं, तेव्हाच भांडण होतं. भांडण म्हणजे द्वेष नव्हे, तर मनातलं ओझं हलकं करण्याचा प्रयत्न असतो.