लव कल्लोळ - ७

दोघेही एकमेकांना टाळी देत हसतात. थोड्या वेळानंतर ते लोणावळा शहरात प्रवेश करतात. एका हॉटेलमध्ये चहा आणि नाश्ता करतात आणि पुन्हा बुशी डॅमच्या दिशेने निघतात. हलका हलका पाऊस सुरू झालेला असतो. शहर संपताच आजूबाजूला जुनी घरे, बंगले, भरपूर झाडे लागतात. उतरत्या छापराची कौलारू घरे, त्यावर साठलेले शेवाळे, झाडांवर चढलेल्या वेळी, रस्त्याच्या दुतर्फा असलेली झुडपे, फुलझाडे आणि त्यांना लागलेली विविध रंगांची फुले, आकाशात दाटून आलेले काळे काळे ढग, थंडगार वारा, पावसाच्या हलक्या हलक्या धारा आणि गाडीत लागलेले छान रोमँटिक गाणे हे पाहून दोघेही वातावरणात समरस होऊन जातात. निसर्गाचा आस्वाद आणि एकमेकांची सोबत अशी दुहेरी मेजवानी मिळाल्यामुळे दोघांचाही मूड ताजातवाना झालेला असतो. काही वेळ ड्राइव्ह केल्यानंतर ते बुशी डॅमला पोहचतात. गाडी पार्क करून टीशर्ट आणि शॉट्स घालून ते डॅममध्ये जातात.