मायलेकी— सख्ख्या वैरी (भाग-१)

"आई आहेस की कोण आहेस गं तू? वाटलं नव्हतं एवढ्या खालच्या थराला जाशील. तुझ्यापेक्षा शत्रू बरे. माझ्या बाबांना कधी प्रेमाने पाहिलं नाहीस की दोन शब्द नीट बोलली नाहीस पण माझा संसार मोडायला मात्र तू एक क्षण विचार केला नाहीस. अशी कशी दळभद्री आणि नीच असू शकतेस तू? आतापर्यंत तुझ्याबद्दल तक्रारी होत्या, नाराजी होती पण आज खऱ्या अर्थाने तिटकारा आणि तिरस्कार वाटतोय मला तुझा... तुला 'आई' अशी हाक मारणं खूप आधीच सोडून दिलं होतं मी आणि आज कळलं खरंच तू माझी आई असण्याच्या लायकीची नाहीस. थुंकते मी तुझ्या मातृत्वावर... कोणत्या जन्माची शिक्षा मिळाली आणि मी तुझ्या उदरातून जन्म घेतला, हेच कळत नाही. या जन्मात आई झालीस परत कधीच, कोणत्याही जन्मात, कोणाचीही आई होऊ नकोस, मिस अनिता कानेटकर." साक्षीने बोलायला सुरुवात केली आणि सरळ अंतःकरणातून अख्खा लाव्हा रस बाहेर काढून मोकळी झाली; तरीही अजून बरेच काही मनात साचलेले होतेच.