मानलं तर मुलगी - नाहीतर सूनच

मालतीबाईंनी त्यांच्या आयुष्यात खुप दुःख, कष्ट सोसले होते. त्यांचा मुलगा राहुल पोटात असतानाच त्यांना वैधव्य आले होते. तेव्हापासून त्या खुप एकट्या पडल्या होत्या. राहूलचा जन्म झाल्यापासून त्यांनी खुप काबाडकष्ट करून त्याला वाढवलं होतं आणि त्याचं शिक्षणही केलं होतं. तो आता चांगल्या नोकरीला होता. सगळं काही व्यवस्थित होतं पण मालतीबाईंच्या मनात एकच भिती होती ती म्हणजे आपला मुलगा आपल्यापासून दूर जाईल की काय, त्या भितीमुळेच त्या अन्विताशी तुटकपणे वागत होत्या. पण अन्विता काहीच तक्रार करत नव्हती.